Ég, Helga semsagt, á BESTA kærasta í heimi sem gaf mér flottasta gemsa í heimi! Nefnilega Nokia E70! Ekkert smá flottur. Hann er mjög líkur þessum gamla mínum sem var búinn að gefa upp "röddina" greyið, fyrir u.þ.b. tveimur mánuðum síðan. Frekar erfitt að láta hringja í sig þegar síminn titrar bara. Ég var búin að skoða fullt af símum og eftir að ég skoðaði E70 týpuna þá bara kom enginn annar til greina. Ákvað svo að kaupa mér hann í vor. En nei, nei. Palli bara gaf mér hann í jólagjöf.
Sem varð eiginlega til þess að mér fannst allt í einu lítið til brauðristarinnar/grillsins koma sem ég gaf honum!
Annars fengum við þessar líka fínu gjafir; mjög flottan heklaðan dúk, bækur, heimabakaðar Biscotti (Nammmm), boli, dagatal (tölvuskrappað), þæfðar myndir (frá Eyþóri) FULLT af gjöfum frá Marek - ég fékk 5 og Palli 2, bolla, DVD, KONFEKT (aftur Nammmm), geisladisk og ég veit ekki hvað og hvað.
Þetta voru með öðrum orðum frábær jól, æðislegar gjafir, æðislegur matur og fengum frábæra gesti á eftir þar sem Inga og Hjalti og börn komu. Strákarnir voru alveg að flippa yfir, ég varð á tímabili að taka í hendurnar á Marek og biðja hann um að draga djúpt andann og slappa svolítið af. Það virkaði.

Ætla að fara að lesa "Ein til Frásagnar". Hafið það gott.

Gleðileg jól

Hér á Ringgade er allt að verða tilbúið fyrir jólin, búið er að þrífa (nema að skúra eldhúsgólfið - ætla að klippa Palla fyrst), baka, skreyta jólatréð, setja jólaskraut og dúka um allt. Nú á bara eftir að pakka inn jólagjöfum til Palla og strákanna og já... bara slappa af!

Ég hlakka eiginlega mest til að opna jólakortin á morgun! Það er einhver svona viss jólastemming að opna jólakortin. Skrítið!

Palli fór út í búð og keypti sér jólagjöf frá mömmu sinni. Hann keypti hátalara og tók þá strax upp - alveg steinhissa á að fá svona fína gjöf frá mömmu sinni - einmitt það sem hann vantaði!
Svo tengdi hann fartölvuna við sjónvarpið og hátalarana líka og þá gátum við horft á fréttirnar á RÚV í sjónvarpinu en ekki í tölvunni eins og hingað til.

Svo ætla Inga Lena og Hjalti að koma hingað á gamlárskvöld. Við ætlum að borða kalkún saman og horfa svo á áramótaskaupið saman!

Halló. Palli hér.
Ég tók þessa mynd út um svefnherbergisgluggann áðan eða um klukkan 11:30 þann 24. des.2006 og eins og sést á myndinni er nú ekkert rosalega jólalegt hérna í Danmörku. Nánast logn og líklega um 8-10 stiga hiti.


Gleðileg jól segjum við hér í Danmörku!

Allt er nú til!

Haldiði ekki að ég hafi ekki séð þessa auglýsingu í auglýsingapésa frá verslun hér í bæ. Já, þetta er svona "Trivial Pursuit" vínsmakkarans! Þetta er alveg kjörið fyrir Rauðvínssmökkunarklúbbinn sem var og hét (Hann þurrkaðist víst upp þegar við Solla fluttum frá Akureyri). Og þetta spil kostar ekki nema 99.95 dkr. Nei, ég held ég kaupi nú bara rauðvínsflöskur fyrir þann pening!

Annars erum við öll komin í jólafrí - nema Marek greyið. Siðasti dagurinn hans er á morgun. Eyþór fékk auðvitað frí í skólanum til að fara til Íslands. Ég keyrði hann og Kjarann í gær og ákvað að gera ekki rassgat í Köben heldur fara beint heim aftur. Og ekkert smá sem ég var fegin því, kl. 9 um kvöldið, að vera ekki t.d. hálfnuð á leiðinni heim!

Annars... þetta spil minnir mig á frétt sem ég las um daginn á Mbl.is um sölu víns til matargerðar í Hagkaupum. Ég fann ekki greinina aftur til þess að geta vitað í hana en allavega þá var talað um að alkohólistar myndu freistast til að kaupa það og drekka og að það mætti alls ekki hafa svona áfengi fyrir augum þeirra. Þessi grein er búin að angra mig síðan ég las hana því að hvað með matarfíklana? Og Sykurfíklana? Hvað á það að þýða að vera með sælgæti við afgreiðslukassana? Svo maður geti glápt á það og látið freistast til að henda einum poka eða svo ofan í körfuna þar sem maður stendur þarna í biðröð? Er ekki offita orðin heilbrigðisvandamál í heiminum? Ekki veit ég hvort er meira vandamál offita eða alkohólismi og ætla ekkert að giska á það. Enda er mér nokkuð sama - hvort tveggja er vandamál. Og ég ætla ekki einu sinni að minnast á spilafíknina og alla spilakassana sem eru fyrir allara augum í sjoppum.

Ég segi; áfram með vín til matargerðar í hillum Hagkaupa og víðar!

Og hananú! Þá er ég farin niður í þvottahús og sinni mínu húsmóðurhlutverki af fullri alvöru.

Hæ. Palli hér.
Smá svona ábending hérna. Mig langar til að benda ykkur á að lesa þetta.
Þetta er dagbókin á blogginu hans Ásgeirs Páls sem er að vinna á Bylgjunni, sá sem hlær alltaf manna mest í þættinum Reykjavík síðdegis. Sérstaklega man ég vel eftir hláturskastinu hans um miðjan september síðastliðinn en ég man nú ekki nákvæmlega hvert umræðuefnið var þá. En dagbókin hans er full af skemmtilegum (en líklega staðfærðum) skemmtisögum. Njótið.

Veðurfarsfréttir

Já, það er nú fínt veður hérna, það verður nú að segjast. Þó bar nú til tíðinda nú í morgun þegar við kærustuparið fórum út fyrir sólarupprás til að keyra húsbóndann til vinnu. Já, það er sko Palli.
Það hafði nefnilega frosið í nótt og þurfti að draga upp úr hanskahólfinu geisladisk í hulstri svo hægt væri að skafa af framrúðunni. Jáh! Ég segi það satt!
Annars kom svo sólin upp eins og venjulega og skein í smástund áður en skýjin huldu hana aftur.
Ekki nóg með að þetta sé fréttnæmt, heldur varð ég BÆÐI að kveikja á ofni inni í stofu (hef ekki þurft þess með fyrr) OG fara í SOKKA sem ég geri helst aldrei, a.m.k. ekki hér heimafyrir! Af þessu tilefni valdi ég mér jólasokkana góðu sem ég keypti í Boston fyrir rúmu ári síðan sumum til einhverrar gremju! :-)

Smartsíminn er aftur kominn í "lag". Það er sem sagt hægt að hringja í og frá honum en það heyrist alltaf bergmál okkar meginn. Vandamál sem Hinrik hreinlega hatar eins og hann segir sjálfur frá en hann leysir þetta þannig að hann heldur á símtólinu fyrir framan sig og stólar á að sá sem er í símanum geti talað nógu hátt til að hann heyri. Þannig sleppur hann frá því að heyra bergmálið leiðinlega.

Næst á dagskránni er að keyra Eyþór og Kjarann (úr skólanum mínum) til Kaupmannahafnar á miðvikudagsmorgun. Það er aldrei að vita nema maður skreppi aðeins á Strikið - þó ekki væri nema bara til að skoða stemminguna þar. Ætla bara að ákveða það þegar þar að kemur.

Verð annars að fara að læra. Þarf að skila inn ritgerð á þriðjudaginn.

Jólin nálgast óðfluga!

Já, við ákváðum að skreyta fyrr en venjulega. "Venjulega" þýðir sko Þorláksmessa en við höfum yfirleitt ekki skreytt neitt fyrr en þá. En vegna þess að Eyþór fer til Íslands og kemur ekkert heim fyrr en eftir áramót þá ákváðum við að skreyta jólatréð og stofuna (við erum nú ekki vön að skreyta mikið meira en það) í dag. Skreyttum meira að segja piparkökuhús - það er eitthvað sem við höfum ekki gert áður! Við höfum venjulega verið með jólaseríur en það verður einhver breyting á þessi jól. Íbúðin er nefnilega svo gömul og "asnalega" hönnuð að það eru í fyrsta lagi bara ein innstunga inni í svefnherbergjunum og í öðru lagi þá er innstungan við dyrnar - lengst frá gluggunum! Mjög heppilegt eða þannig! Við erum nú svo ljónheppin að það eru heilar tvær innstungur inni í stofu. Við aðra fara allar rafmagnsgræjur heimilisfólksins - nema þær græjur sem tilheyra eldhúsi auðvitað - þ.á.m. tölva, prentari, hub, router, smartsími, flakkari, sjónvarp, PS2, video og örugglega eitthvað fleira sem ég man ekki eftir. Hin innstungan verður notuð til að kveikja á jólatrésseriu.

Annars eru leiðinlegar fréttir; s.k.v mbl.is þá er bilun í sæstreng til Íslands sem þýðir að við höfum mjööööööögggg lélegt - ef eitthvað - samband í smartsímann til Íslands. Ég náði að hringja til Þórunnar systur, en þau heyrðu ekki í mér. Þau ætluðu svo að hringja til baka en þá gátu þau það ekki. Það sem verra er, er að strengurinn kemur sennilega ekki í lag fyrr en eftir 3 vikur! Það er ömurlega langur tími!

Jæja, best að setja inn nokkrar myndir: Desembermyndir

Skadeklinik

Ég ætlaði eiginlega að blogga í gær, var bara svo geðveikt þreytt að ég gat það bara ekki.
Við þurftum að sækja Hinrik Elvar snemma í leikskólann fara með hann á bráðavaktina í fyrradag. Hann hafði verið að leika sér og hafði dottið og lenti með nefið á tréarm á sófa sem var þarna. Hann fékk heilmiklar blóðnasir og bólgnaði þónokkuð og við fórum með hann til að láta kíkja á hann. Það leit allt ágætlega út, okkur var líka sagt að það yrði ekkert gert þó hann væri nefbrotinn en ef við teljum það þá þurfum við að fara með hann til háls-, nef- og eyrnalæknis.
Hann fékk ekki heldur heilahristing, svo þetta var allt í lagi.
Núna er hann með örlítið bólgið nef og með marblett yfir því miðju.

Eyþór fer til Íslands á miðvikudaginn í næstu viku og hann er ekkert smá farinn að hlakka til :-)
Hann nær held ég bara alveg tveimur vikum þarna, ef mig minnir rétt. Hann fær að fljóta með strák sem er í sama skóla og ég og er á leið í jólafrí. Æi, mér finnst eitthvað svo miklu betra að vita af honum með einhverjum sem maður kannast við heldur en að kaupa handa honum fylgd. Ekki það að fylgd sé eitthvað slæm... veit reyndar ekkert um það hvort hún sé slæm eða góð!

Jæja, farin að elda kjúllarétt!

Loppumarkaður og Þýskaland

Já, ég veit að þetta virðist vera endurtekning frá einhverju öðru bloggi. En jú ég fór bæði á loppu og til Þýskalands í gær. Fór reyndar á loppu aftur í dag, en það er nú allt önnur Ella.

Hallfríður Ólafs kom í heimsókn yfir helgina og var laugardagurinn tekinn snemma. Fyrst var farið á flóamarkað sem var hér rétt fyrir utan Sønderborg. Þar keypti ég kaffi/kakó könnu, hvíta með gyllingu á brúnum, en mig einmitt VANTAÐI svoleiðis! Það voru nú bara heilar 8 könnur í boði! Og svona ýmislegt annað mis-nytsamlegt.

Því næst fórum við til Flensborgar að versla og stóðum okkur allveg með prýði við það. M.a. var keyptur jólamaturinn; Hamborgarhryggur! Ég er nú svo vitlaus - ef mig skyldi kalla - að ég vissi ekki hvernig hamborgarhryggur lítur út! Fyrst það var ekki hægt að kaupa innpakkað stykki með greinagóðri merkingu á þá stóð ég bara á gati! Sem betur fer er þetta kjötstykki líka kallað hamborgarhryggur á dönsku og það vissi einhver sem var að afgreiða þarna og gat selt mér tæplega 1,8 kg. stykki. Borgaði ég bara 1.100 krónur fyrir þetta allt. Það getur vel verið að 1,8 kg sé alls ekki nóg fyrir okkur 4 (Eyþór fer til Íslands) en þá bara borðum við meira af eftirrétt eða einhverju. Hey! Eigiði góða uppskrift af góðum eftirrétt sem er hvorki ís né möndlugrautur? Og það má ekki vera mjög mikið áfengi í honum. Flestir þeir eftirréttir sem mig langar mest í innihalda áfengi!

Allavega! Það er búið að kaupa allar jólagjafirnar og næstum því búið að pakka þeim öllum inn og svo er planið að senda þetta á morgun.

Í dag komu Inga og Hjalti svo í brunch og Inga fékk þessa brilljant hugmynd að skreppa aftur á flóamarkaðinn. Ekki var ég nú treg til þess! Ég hafði nefnilega hálf séð eftir að hafa ekki keypt þarna nokkur vatnsglös í búið. Við drifum okkur allar þrjár (Hallfríður líka sko) og Inga fann þarna ýmislegt sem hana vantaði eins og aðventukertastjaka og jólatrésfót. Það hafði heldur betur bæst við draslið... nei ég meina sko góssið frá því daginn áður og Hallfríður fann þarna þennan forláta fýsibelg sem hún keypti. Ég setti inn myndir frá flóamarkaðinum sem ég tók á símann minn en ég er ekki búin að taka mynd af könnunni og glösunum. Þær koma þá bara seinna.
Oh, ég er strax farin að hlakka til næsta sumars þegar flóamarkaðirnir verða fjölmargir hverja helgi!
Já, það er sko gaman að vera til - sérstaklega um helgar.

Helga - auðvitað!

Þetta er hræðilegt....

Ég heyrði eitthvað af þessu í útvarpinu í dag og sá það svo núna á netinu. Fjegur ungmenni dóu....


Fire unge dræbt under lastbil...

Fire unge mistede kort efter middagstid livet i en makaber trafikulykke nord for Grindsted på hovedvej 30 mellem Filskov og Grønbjerg.

Personbilen med de fire unge kørte af ukendte årsager pludselig over i modsatte vejbane, hvor den frontalt ramte en lastbil. De unge mennesker blev på dén måde mast under lastbilen.

- Vi har endnu ikke overblik over, hvorfra de fire unge kommer, eller hvor gamle de er, oplyser vagthavende ved Vejle Politi.
Með íslenskum orðum:
Fjögur ungmenni misstu stuttu eftir miðdagsbil lífið í helþrungnu umferðaróhappi. norður af Grindsted á vegi 30 milli Filskov og Grønbjerg.

Fólskbíll með fjórum ungmennunum ók af óþekktri ástæðu skyndilega yfir á öfugan vegarhelming, þar sem framendi fólksbílsins lenti á flutningabíl. Fólkið festir með þessu móti undir flutningabílnum.

-Við vitum ekki á þessari stundu hvaðan ungmennin fjögur er eða hversu gömul þau eru, upplýsir lögregla á vakt hjá lögreglunni í Vejle.

Skelfilegt og þar að auki var EKKI hálka eins og á Suðurlandsveginum.

Kveðja,
Palli.

Það var mikið...

...að gera um helgina. Okkur var boðið í jólaglögg hjá fólki sem við rétt könnumst við. Eða öllu heldur ég (Helga) en ekki Palli. Konan heitir Ann, er færeysk og er í sama skóla og ég, að læra fatahönnunartækni. Maðurinn hennar heitir Gísli og er íslenskur. Ann s.s. bauð okkur og ég þáði. Sá hálf partinn eftir því á laugardaginn, því það er alltaf eins - letin að drepa mann en við ákváðum að drífa okkur og sáum sko ekki eftir því. Strákarnir komu með okkur og léku sér allan tímann mjög vel með syni þeirra sem er 8 ára. Það kom líka fleira fólk þarna og þar á meðal maður sem Palli hafði áður hringt í útaf vinnu. Gísli hafði látið mig fá númerið hans. Maður þessi er kallaður Siggi og sátu þeir Palli og spjölluðu mest allt kvöldið. Þá kom í ljós að hann hafði búið um stund á Hvammstanga. Ég kannaðist ekkert við hann, enda ekkert ólíklegt, því eins og allir vita er Hvammstangi svo stór staður að ómögulegt er að þekkja alla sem þar búa eða einhvern tíman hafa búið þar. En þegar hann sagðist hafa verið í hljómsveit með Gassa og Silla kveikti ég á perunni og fattaði hver hann var. Á þeim tíma var hann nefnilega kærasti vinkonu minnar og ég var svo oft með henni í hljómsveitaskúrnum.
Hljómsveit þessi, sem kölluð var Ecco, náði aldrei vinsældum út fyrir Húnavatnssýslu né heldur lagi á vinsældarlista.
Var Gústi Dan einhvern tíman í Ecco? Það er eins og mig minni það, en er ekki viss.

Skemmtilegt það!

Svakalega gaman....

Það er eitt sem ég var að uppgötva, en margir hafa sjálfsagt gert á undan mér, en það er að rugla saman orðun í stuttum fréttum á til dæmis mbl.is. Útkoman getur verið alveg óbærilega fyndin ef hugmyndaflugið er nógu mikið.
Hér er til dæmis dæmi (sem mér finnst fyndið :-)

Snjókoma eða slydda reyndi að stinga rögreglu af.

Veðurstofan í Keflavík spári norðan 10-15 m/s á Reykjanesbraut í nótt og snjókomu eða slyddu, á 132 km hraða á klukkustund. Sunnan og suðvestan 141 km/klst og skúrir eða él vegna óláta sunnanlands, en léttir til á lögreglustöð norðaustanlands. Hægari í handjárn með kvöldinu og úrkomulítið á Aðalgötu.

fengið á mbl.is

Kveðja,

Palli.