LAAAAAAAAANGT BLOGG....... FRÁ PALLA......

Komið þið sæl.
Hér að neðan eru viðbrögð ykkar við seinasta bloggi frá mér:

*geisp* Helga pelga | Homepage | 03.24.07 - 2:09 pm | #

ZZZZzzzzzzzzzzzzzz Óla | 03.24.07 - 5:47 pm | #

(O_O) Þórunn | Homepage | 03.24.07 - 5:50 pm | #

jájá þröstur | 03.24.07 - 9:03 pm | #

Líst vel á þetta, meira bílablogg takk Hallfríður Ósk | Homepage | 03.25.07 - 4:11 am | #

Ahh.... elsku frænka mín. Loksins einhver jákvæðni í minn garð Palli | Homepage | 03.25.07 - 4:28 am | #

Palli minn - hver heldurðu nenni að lesa þessa langloku ????? Tengdó | 03.25.07 - 6:38 pm | #

ææææææææææææææææææ hvar er Helga ? gunna | Homepage | 03.25.07 - 6:47 pm | #

Því segi ég eftirfarandi:
Ég er kominn heim í "helgarfrí". Fór langt og víða í seinustu viku, mest um Þýskaland. Gott að koma heim.

Takk og verið þið sæl.

Komin í páskafrí

Jæja, ég skal nú reyna að tala um eitthvað annað er dýragarðinn hérna á heimilinu. Enda fer að fækka í honum því það kom meindýraeyðir í morgun og eitraði allt.

Já, við strákarnir erum komin í páskafrí og er það bara geðveikt. Við í skólanum, skiluðum verkefni kl. 13 í dag. Eða áttum að skila því kl. 13 en það kom upp smá panik þegar klukkan var hálf eitt sem endaði með því að við skiluðum of seint. En það kemur ekkert að sök - vona ég!

Eyþór fer svo til Íslands á sunnudaginn og verður fram yfir páska. Sama dag kemur Lóa tengdó með Helgu Rún dótturdóttur sinni til okkar og þær verða í viku. Við stefnum á að fara með þær til Hamborgar í dýragarðinn þar.
Þær verða svo rétt farnar þegar Olga, Baldur og börn kom í heimsókn og verða líka í viku. Við ætlum þá að skreppa í Legoland en okkar strákar hafa ekki farið þangað áður - nema Eyþór.

Annars er bara allt í gúddí - ég er dauðþreytt og ætla mjööööög snemma að sofa! Ja, allavega ekki mikið seinna en kl. 1! Hehehehe...

Fréttir!

Já, héðan er nú aldeilis mikið í fréttum. Íbúðin er hreinlega að breytast í dýragarð - og sumarið bara rétt að byrja!
Fyrst ber að nefna helvítis veggjalýsnar. Þegar ég hélt að ég hefði verið búin að drepa allt kvikt inni í herbergi strákanna - þar sem kojan er - og herbergið sjálft verið í hálfgerðri sóttkví í næstum 3 vikur ákvað ég að það væri kominn tími fyrir strákana að sofa þar inni. Hinrik niðri og Marek uppi. Ég fór seint að sofa og leit inn til þeirra, ætlaði að laga sængina hans Hinriks þegar ég sé 3 lýs ofan á sænginni, nokkrar á veggnum og nokkrar á kojunni sjálfri. Ég vakti þá báða og lét þá sofa hjá Palla en svaf sjálf inni í stofu - í öllum fötunum! Þetta er algjör viðbjóður.
Í gærmorgun fékk ég Hrund til að hringja í leigufélagið en við fundum einhverjar reglur um að þeir eigi að sjá um að drepa þessi kvikindi. Ekki nóg með það heldur fann ég líka upplýsingar um að þetta eitur sem fæst hér í DK DREPUR EKKI KVIKINDIN heldur FÆLIR ÞAU Í BURTU. Já, flott! Kaupum endilega vonda lykt í brúsa sem fælir skordýrin yfir í næstu íbúð svo ég sé laus við þau! Alveg hreint dásamlegt.

Þá að hömstrunum. Mér fannst vera orðið ansi þröngt um þá í búrinu með ungana 5 og mömmuna og það var eitthvað um fæting núna fyrir helgina. Við ákváðum að leyfa þeim að vera yfir helgina svo vinir hans Mareks fengi að skoða þá og fara með þá strax á mánudaginn. Það var svo drifið í því í gær, strax eftir skóla og Eyþór var svo heppinn að hann fékk heilar 100 krónur fyrir allan hópinn. Ungana sko. Hann keypti kúlu til að setja kelluna í á meðan við þrífum búrið og hún var prufukeyrð strax þegar við komum heim. Kellan virtist vera bara nokkuð ánægð með að vera orðin alein í hreinu búrinu á eftir og laggði sig.
Í morgun langaði Eyþóri til að setja hana aftur í kúluna en ég vildi það ekki því ég var viss um að hún væri ólétt aftur - eftir kallinn sinn auðvitað. Ég kíkti í búrið og viti menn; hún var búin að gjóta aftur! Í þetta sinn var hún svo hugulsöm að gjóta á efri hæðinni svo við gátum séð ungana. Við töldum 7 unga! Við vissum samt vel að einhverjir gætu átt eftir að hverfa svo við fyrsta tækifæri sem gafst nú seinnipartinn töldum við aftur og sáum að þetta var ekki endanleg tala heldur eru þeir 9!!! Já, NÍU! Það þýðir að í heildina verða 10 stykki í búrinu! Ja, nema hún eigi eftir að borða einhverja. Ég stökk til og tók nokkrar myndir með símanum mínum. Þær eru ekki mjög skýrar, því það er erfitt að taka myndir af þeim þar sem þeir eru svo mikið að sprikla! En skoðið endilega inni í Hamstraalbúminu. :-)
(þið getið rétt ímyndað ykkur hvort Eyþór sé ekki búinn að reikna út gróðann!)

Ég set líka inn nýjar myndir inn í marsmyndir.

Tveggja tíma munur

Já, það er víst búið að breyta klukkunni. Ég hafði bara ekki hugmynd um það fyrr en ég kom heim klukkan að verða hálf fjögur. Þ.e.a.s. ég vissi - einhvern tíman í síðustu viku að klukkan ætti að breytast nú um helgina - en glætan að ég hafi munað það í svona langan tíma!

Ég sem sagt vaknaði kl. 7:30 í morgun og gerði mig klára fyrir skólann en við erum að vinna verkefni þessar vikurnar og það er sko ekkert slappað af um helgar. Eins og ég sagði áðan var ég búin að steingleyma því að klukkan breyttist í nótt - og tók líka ekki eftir neinu því bæði gemsinn minn og eldhúsklukkan uppfærist að sjálfu sér. Við erum svo tæknilegt fólk, skilurðu?

Ég mætti svo í skólann kl. 9 og þegar Hrund kom rétt fyrir kl. 10 leit hún strax á klukkuna og spurði hvort við hefðum breytt henni. Enn fattaði ég ekkert. Neibb, enginn hafði breytt henni og hún var víst rétt.

Það var svo ekki fyrr en nokkru eftir að ég kom heim sem Palli talaði um að klukkan í ógeðslegagamlasímanum hans hefði ekki uppfærst sjálfkrafa og því hefði hann verið alveg ruglaður í morgun! Ha? Breyta klukkunni? Núna, strax? spurði ég og kom alveg af fjöllum... já eða örlitlum hæðum!

En já. Semsagt; nú er tveggja tíma munur aftur svo ekki hringja í okkur mjög seint um kvöld.
Talandi um að hringja. Ég ákvað að leggjast í símann áðan, hringdi í a.m.k. 10 mismunandi símanúmer og það svaraði enginn. ENGINN! Hvar voru allir. Mér leið næstum því eins og Palla sem var einn í heiminum - fyrir utan að ég vissi að Palli var úti í sandkassa með strákana!
En hvað var að gerast í dag á Íslandi? Verðstríð? Ókeypis eitthvað? Gott veður? Hvar voruði í dag rétt fyrir kaffileytið? Ég bara spyr... og næt þetta nægja.

Umhverfið......

Já. Hér áðan þegar ég kom heim var húsið troðfullt af ungdómi ættuðum frá Danmörku ásamt örfáum íslendingum, heimilisfólkinu. Marek bauð nefnilega vinum sínum í afmælisveisluna sína (númer 2 reyndar) sem var nú í dag sem sagt.

Í þessari ágætu vinnu sem ég er í (Palli sko, já ég get líka bloggað, stundum) fæ ég að sjá ansi mikið af fallegum húsum og byggingum. Til dæmis við Veg 205 í Þýskalandi stendur hús sem gæti verið kirkja eða kastali. Ég er ekki viss um hvort það er en það er mjög flott bygging.
Ég er sem sagt að vinna hjá fyrirtæki sem heitir PK Transport. Það er einhvers konar flutningafyrirtæki nema það á mjög fá vagna, en mest bíla sem draga annara fyrirtækja vagna.
Ég er mest í þeirri deild að aka frá Frederikshavn, hvar vagnarnir koma til lands eftir siglinu frá Oslo. Einstaka sinnum hef ég farið til Kaupmannahafnar til að sækja þessa vagna en þá er það vegna þess að þeir hafa ekki komist í Frederikshavn ferjuna. Svo dreg ég þetta til Hamburg í Þýskalandi þar sem þeir eru aflestaðir morguninn eftir. Eftir losun og dálítinn svefn yfir nóttina er ég sendur til ýmissa fyrirtækja til að fá lestun á vagninn aftur því ekki mega þeir fara tómir til Noregs. Það er alveg bannað. Þá er oftast sendur til fyrirtækis sem heitir Euroline en það er "HUGES" stórt dreifingafyrirtæki fyrir hin og þessi fyrirtæki hingað og þangað um Evrópu. Einhverskonar Flytjandi (eða Pakkhúsið á HVT) okkar íslendinga. Svo þegar vagninn er orðinn fullur af vörum og kössum og brettum og þess háttar þá ek ég aftur til Køben eða Frederikshavn með vagninn og skila honum út á bryggju. Sæki svo þann næsta daginn eftir og svona gengur þetta.
Hér koma nokkrar tölulegar upplýsingar fyrir þá sem alls ekki nenna að lesa svoleiðis lagað hehe.

Bifreið: Í flestum tilfellum VOLVO 420 hestafla eða 380 hestafla.
Fjöldi ása: 2
Fjöldi hjólbarða: 6
Meðal eyðsla: 29 lítrar á hundraðið (ca 3,5 km/líter)
Heildarakstur á seinasta bíl sem ég var á: 835.700 þegar ég lagði honum. Þá hafði ég ekið honum ca 3200 km á 5 dögum.
Heildar snúningsfjöldi á mótor þessa rúmlega 835.000 kílómetra: Já haltu þér nú, 917.720.000 (níuhundruðogsautján milljónir sjöhundruðogtuttuguþúsund) snúningar. Og þá er það líklega sinnum tveir því eins og margir vita þá snýst sveifarás í fjórgengis mótor tvo hringi til þess að klára "einn vinnu (eða sprengi) hring.

Þetta var nú aldeilis skemmtilegt og ef ég fæ eitthvað fá komment (færri en 5) út á þetta þá verð ég rosa fúll :-)


Takk og bless í bili.
Palli.

Marek á afmæli

Þessi ofurhetja varð 7 ára í dag! Hann er loksins búinn að missa tönn og nýja fullorðinstönnin er komin upp eins og sést "glögglega" á þessari mynd. Við héltum smá kaffiveislu hér heima - eiginlega bara ég og strákarnir, en svo verður strákunum í bekknum hans boðið í almennilega veislu á laugardaginn.

Danir nota fánann sinn mjög, og þá meina ég MJÖG, mikið í kringum afmæli. Ef það er flaggstöng fyrir utan þá er fánanum flaggað annars - eða jafnvel líka - er litlum fánum stungið niður fyrir utan dyrnar, jafnvel alveg meðfram stígnum að útidyrum. Inni er borð og annað skreitt með fánum í öllum stærðum (ekki gerðum). Mér finnst þetta flottur siður og ég segi enn og aftur - nema þetta sé í fyrsta sinn - að mér finnst að Íslendingar ættu að nota þjóðfánann oftar.

Annars verð ég bara að segja ykkur frá því að það að búa hér er bara rétt eins og að búa í Víðidalnum. Það var búið að slá garðinn þegar ég kom heim úr skólanum í dag. Graslyktin var allt um kring - alveg yndisleg - og sólin skein. Það var reyndar ekkert sérstaklega hlýtt en allavega rúmlega 10 gráður, held ég.

Hamstraunginn - strokufanginn - slapp aftur út í gær og ég komst að því hvernig hann fór að þessu. Hann gat nefnilega galdrað. Nei, nei ekki í alvörunni. Hamstrarnir hafa steinefnisstein hjá sér sem er festur í rimlana á búrinu og þegar Eyþór setti hann síðast þá glennti hann rimlana of mikið í sundur til að koma steininum fyrir, og minnsti hamsturinn bara laumaði sér út! Ekki mjög flókið. En hann fannst fljótlega eftir að hann slapp, rétt við borðið.

En annars er bara gott að frétta af okkur.

Ekki lengur týndur

Hamstraunginn er kominn í leitirnar. Á lífi meira að segja. Ég veit ekki hvernig hann komst út úr búrinu en hann allavega fannst ofan í öðrum inniskónum mínum sem er loðfóðraður og hlýr. Eins gott að ég steig ekki á hann! Hann var sko glaður að komast aftur inn í búrið til hinna og til þess að fá sér að borða.
Gott mál.

Einum færra

Einn hamstraunginn er týndur! Við vorum að þrífa búrið áðan og þá voru bara 4 ungar og svo mamman en ég get svo svarið fyrir að ungarnir áttu að vera 5. Er það annars ekki örugglega? Jú, þeir voru 5. Palli rótaði í saginu í búrinu en ekkert var þar. Þá er bara tvennt til í stöðunni; annaðhvort hefur unginn náð að sleppa og leikur lausum hala í íbúðinni (engin merki samt um það í kringum borðið þar sem búrið er) eða að hann hafi orðið matur fyrir hina! Ojjjj.... ég veit ekki hvort mér þykir verra... eða skárra. Bæði er vont og hvorugt venst!
Veit einhver eitthvað um það hvort það sé algengt að þeir séu étnir orðnir þriggja vikna gamlir??
Kerlingin var eitthvað að argast í þeim um daginn, Eyþór sagði að hún léti þá ekki í friði og væri alltaf að bíta í þá, veit ekki hvort hún lét svoleiðis við einn eða alla.
Ojjj.

Að búa í útlöndum

Viljiði vita hvaða ókost útlönd hafa miðað við Ísland? Pöddur! Þær eru bókstaflega út um allt. Þessa dagana erum við að berjast við veggjalýs eða sengelus eins og hún heitir á dönsku. Ógeðsleg kvikindi sem bíta mann á nóttunni. Ég veit ekki hvaðan hún kom, hvort hún var í íbúðinni fyrir eða hvort hún barst inn með einhverju en það er bara ca 2 mánuðir síðan við fyrst tókum eftir henni. Og hún hefur verið aðalega inni í herbergi strákanna. Ég vona að með þrautseigju og þolinmæði náum við að drepa hvert og eitt einasta kvikindi sem er hér þannig að maður þurfi ekki að kosta til meindýraeiði. Nú er bara að taka hvert herbergi fyrir sig... þrífa hátt og lágt, ryksuga og spreyja eitri.
Ógeðslegt!
- Og köngurlærnar eru að fara að vakna til lífs eftir veturinn!

Marek snillingur

Marek sagði við mig áðan:
- Mamma, ertu ekki mjög glöð að eiga einn strák sem er ofurhetja?
- Jú, svaraði ég.
- Ég get sko ekki flogið en ég er MJÖG sterkur.

Hann er bara snillingur!

Loksins blogg

Jahérnahér, komið meira en vika síðan síðasta blogg! Og það hefur nú ýmislegt gerst á þessari viku get ég sagt ykkur:

Bobba og Birgir Tómas komu í heimsókn.
Mikill bjór og léttvín var drukkið.
Ég fór tvisvar til útlanda.
Við fórum öll 7 í keilu.
Vorið kom.
Marek missti fyrstu tönnina.
Tannálfurinn kom.
Hamstraungarnir urðu viku eldri.

Þetta er nú ekkert lítið á einni viku! Það er ekki eins og maður lifi litlausu lífi. Ekki aldeilis. Og því til sönnunar eru komnar inn myndir undir heitinu vormyndir. Ég á reyndar eftir að setja inn myndir af því þegar við fórum í keilu. Það eru líka nýjar myndir af hamstrakellunni.

Það var nú bara 18° hiti hérna á mánudaginn og þriðjudaginn. Bobba og Birgir voru svo heppin að fá aðeins nasaþef af góða veðrinu, en þau fóru með lestinni til Köben á mánudag. Ég fór með Hrund til Þýskalands í gær og gekk um miðbæ Flensborgar á þunnri skyrtu. Þá fannst mér ég svo sannalega vera í útlöndum! Oh, það er svo gott að búa í útlöndum!

Marek fékk þá frábæru hugmynd að við myndum kaupa okkur bíl eins og amma og afi eiga "hann er sko nefnilega sjöfaldur í sætum"! Þá getum við sko öll farið í keilu á sama bílnum en ekki farið tvær ferðir eins og um helgina, þegar það eru gestir hjá okkur.

Hef þetta bara stutt í dag.

Update:

Já, líkamsræktarstöðin er opnuð, ja, eða allavega að hluta. Á sunnudaginn var "klæðalaus dagur" og var mætingin ágæt. Ég komst ekki vegna óviðráðanlegra orsaka. Reyndar komst engin kona í tímann... sjálfsagt vegna óviðráðanlegra orsaka. En það hafa um 100 manns skráð sig í sunnudagstímana, þar af tæplega 10 konur. Ég er ekki þar á meðal. Ég verð upptekin við annað!
Meira um þetta - og mynd:

Berrassaðir í líkamsrækt

Við fórum með karlhamsturinn í gæludýrabúðina í dag. Þar með fækkaði um einn í þessari stórfjölskyldu. Mig grunar samt að kellan sé ólétt aftur - vona ekki, en ef svo þá verður það þá í síðasta sinn. Við förum svo með ungana í búðina eftir 3 vikur. Kellan er búin að flytja þá upp á efri hæðina (þið vitið hvað ég meina ef þið skoðið myndirnar) þannig að það er mjög auðvelt að fylgjast með þeim. Strákunum finnst það nú ekki leiðinlegt.

Ég keypti frábæra bók í gær. Ég er svo hrifin af ljósmyndabókum, sérstaklega þeim sem sýna myndir af fólki og fann þessa bók, alveg óvænt í Kvikly.
Þetta er ferlega flott bók um hirðingja, með fullt af ljósmyndum og textinn er aðalega tilvitnanir í hirðingjana. Það besta er að hún kostaði BARA 20 DK.
Frábært!

Nóg í bili.

Góður laugardagur

Eyþór fékk þessa líka brilljant hugmynd að við færum öll út í fótbolta. Það er leiksvæði hinumegin við götuna og þar eru tvö fótboltamörk líka. Liðaskiptingin var þannig að Palli og Hinrik voru saman í liði og ég og Eyþór vorum saman í liði. Nú, hvað gerði Marek þá? Jú, hann var íþróttafréttamaðurinn! Á eftir fórum við Eyþór í bakarí og keyptum kleinuhringi fyrir kaffið. Namm.

Ég er að vinna í því - í þessum pikkuðu orðum - að setja myndir inn á netið. Líka af hamstrakvikindunum sem gegna nöfnunum Kerlinginn og Karlinn! Frumlegt!
Það verða líka þarna myndir frá öskudeginum, í marsmyndaalbúminu, ég veit að öskudagurinn var ekkert í mars en myndirnar eru samt þarna.

Annars er bara allt ljómandi fínt að frétta héðan. Við fáum gesti næsta fimmtudag, þar sem Bobba og Birgir Tómas koma og verða í ca 5 daga. Það verður sko ekki leiðinlegt.

Ég fór á flóamarkað, sá fullt af fallegum hlutum aðalega gömlum veggklukkum, gömlum harmonikkum, hlutum í smáhlutahillu, málverk og jú, líka kaffistell! En það sem mig langaði til að kaupa var of dýrt svo ég sleppti því. Maður verður að vera staðfastur! En kannski kíki ég aftur á morgun...

Fjölgun í fjölskyldunni

Já, það flölgaði heldur betur í gærkveldi. Ég sem hafði verið með fingur, hendur og fætur krossaða um nokkurra daga skeið en allt kom fyrir ekki. Hamstrarnir eignuðust a.m.k. 4 unga í gærkveldi. Ég kíkti aðeins inn til þeirra áður en ég fór að sofa, svona til að athuga matarforðann og svoleiðis og sé þá að kerlingin er inni í nýja húsinu sem við Hinrik keyptum um daginn handa þeim. Ég sé að hún er að vesenast eitthvað og er með eitthvað sem líktist leðurpjötlu! "Hvar í andskotanum hefur hún náð í þetta" hugsaði ég og grunaði ekkert. Mér brá líka heldur betur þegar ég sá að leðurpjatlan hafði fætur og hreyfðist! Æi, greyjin. Kellingin kom aðeins út úr húsinu og dró þá óvart með sér tvo unga út. Ég stökk til og fann myndavélina en náði ekki góðri mynd af þeim. Æi, þeir eru nú hálf sætir greyjin. Þeir eru á stærð við fremstu kjúku litlafingurs - já eða kannski minni. Þegar kellingin sá að þeir lágu þarna fyrir utan rauk hún til og tók þá í fangið - svona milli framlappanna - hvorn fyrir sig og bakkaði inn í húsið.
Í morgun þegar strákarnir vöknuðu og fóru að skoða krílin kom kellingin út úr húsinu en kallinn hugsaði um ungana á meðan. Við urðum að lokka hann út líka svo við sæjum eitthvað inn.
Nú verð ég bara að fara niður í gæludýrabúð og athuga hvort þeir vilji taka við hamstraungum - eftir nokkrar vikur - og það verður að gerast áður en þeir fara að fjölga sér!